ETSY MATORIA
Toetra Ràja
Etsy matoria
eto an-tratrako eto,
mianoka fitia
an'habakaba-tsento!
Ny doboky ny foko
ao an-tsofinao,
mainka mampisoko
ny onjan'ny atao.
Atopatopan'alina,
tinafiny daholo,
miaina lalindalina
ny tsiron'ny tontolo!
Akimpio akia
ny maso mankafy
'ry lanitra iry,
fa mamy ny fitia...
ETSY MATORIA!
Toetra Ràja
09 Desambra 2015
Toetra Rajaonarivony no misalotra ny anarana diam-penina hoe Toetra Ràja. Nanomboka nanoratra tononkalo miendrika "teny fohy isan'andalana" tamin'ny 1983. Anisan'ireo 10 mianadahy nanangana ny Havatsa Sampana Frantsa tamin'ny 2005. Namorona ny tranonkala Pôetawebs, fanandratana ny poeta sy ny pôezia malagasy, tamin'ny 2009. Efa an-dalam-piketrehana ny bokiny "TIAKO - TIAKO FOANA!"