Eto!!!
Ny maoza
Eto misy sento mahatsiaro anao mitsiky...
Eto misy vetso misary mitokiky.
Eto misy embona mandrovitra fanahy,
Eto misy anao na dia lavitra ahy.
Eto misy sangy zary tonga nofinofy,
Eto misy aloky ny masonao nitopy!
Eto misy embona mamaky fo maratra...
Eto misy anao miantsa ao an-tratra!
Eto misy doboka nahita anao nilongy,
Eto misy teboka te hahita anao midongy.
Eto misy faingo maniry zay ho tohiny,
Fa ny eto zao baraingo sao sanatria melohiny!!!
Fa ny eto mantsy fo no tsy mitsaha-manontany,
Ny eto izao ny maso no mangalatra mankany.
Eto izao ny nofy no mitrebona eny ho eny...
Eto misy tia fa ao anaty fonon-teny ...!
ny maoza
22-06-15