Vorona dimy

Soanampoinimialy

“teo Anjaridainako, vorona dimy
nihira ireny hira izay faran’ny tiany
izaho koa nisioka sy nibitsibitsika
kanjo lasa nanidina ny iray: hitsikitsika

teo Amorondranoko, vorona efatra
niantsa ny kalonareo mananelatra
ho azy anie aho mba nitendry gitara
nikorapa-nandositra ny iray: vorontsara

teo Ambonivatoko, vorona telo
nikalo ny antsalinareo malahelo
antra aho ka niezaka nampiara-peo
nikoropa-kelatra ny iray: vorondreo

teny Antendrokazoko, vorona roa
nihira ny iray fa ilay iray tsy afa-po
dia nalaiko ny pilotra sy vato bala
potipotika-rapa ilay voronadala

Ambaravarako, vorona singany
tena tiako ny feony! oh! reveko ny bikany
nanongilana sofina no hany natao
tsy sahy nikotaba aho sao lasana ianao”

Soanampoinimialy