TIAKO - TIAKO FOANA!

Toetra Ràja

Na inona hitranga
na ianao ho moana,
ny alokao ho banga...
Tiako - tiako foana!

Na ianao mitroatra
tsy fantatro nahoana,
fa diso tafahoatra...
Tiako - tiako foana!

Tsy afaka ao am-poko
ao mandavan-taona
ianao mampitoloko...
Tiako - tiako foana!

Fa mbola mibaliaka
ary tsy ho foana
ny hasambarantsika...
Tiako - tiako foana!

Tiako - tiako foana!

Tiako - tiako foana!

Toetra Ràja
09 oktobra 2015

Toetra Rajaonarivony no misalotra ny anarana diam-penina hoe Toetra Ràja. Nanomboka nanoratra tononkalo miendrika "teny fohy isan'andalana" tamin'ny 1983. Anisan'ireo 10 mianadahy nanangana ny Havatsa Sampana Frantsa tamin'ny 2005.  Namorona ny tranonkala Pôetawebs, fanandratana ny poeta sy ny pôezia malagasy, tamin'ny 2009. Efa an-dalam-piketrehana ny bokiny "TIAKO - TIAKO FOANA!"